Në nder të Pavarësisë së Kosovës, shkolla jonë shënoi këtë ditë madhështore me një aktivitet të veçantë – Panairin e Shkencave, ku dija, kreativiteti dhe atdhedashuria u bashkuan në një festë të vërtetë.
Panairi u hap zyrtarisht nga orkestra jonë simpatike, kori i shkollës dhe grupi i valltarëve, të cilët me tingujt, zërat dhe hapat e tyre sollën emocione, krenari dhe atmosferë festive. Ishte një fillim dinjitoz për një ditë që na kujton sakrificën, guximin dhe rrugëtimin tonë si shtet i lirë.
Nxënësit tanë prezantuan punime dhe projekte shkencore me përkushtim e seriozitet, duke dëshmuar se e ardhmja e vendit tonë ndërtohet mbi dije, punë dhe vizion. Përmes eksperimenteve, ideve inovative dhe prezantimeve të tyre, ata treguan se fryma e Pavarësisë jeton në ëndrrat dhe angazhimin e brezit të ri.
Falënderojmë nga zemra të gjithë mësimdhënësit që me përkushtim të jashtëzakonshëm u angazhuan që kjo ditë me rëndësi kombëtare të shënohet sa më bukur e me dinjitet. Kontributi i tyre është dëshmi e përgjegjësisë dhe dashurisë për arsimin dhe atdheun.
Gëzuar Pavarësinë! 
